Տեսանկյուն

Ընտրախախտումներն ազդել են արդյունքների վրա. Արթուր Սաքունց

08.05.2012

Արթուր Սաքունց

«Մենք չենք գտնում, որ Ազգային ժողովի այս ընտրությունները եղել են ազատ և արդար, որովհետև ազատ լինելու համար պետք է ընտրողները կարողանային իրենց կամքն ազատ դրսևորել, որը չի եղել: Մենք ունենք բազմաթիվ փաստեր»,- ընտրությունների դիտարկման արդյունքում այս եզրակացությանն է եկել Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը: Նա կարծում է, որ ընտրախախտումներն էական ազդեցություն են ունեցել ընտրությունների արդյունքների վրա:

Մայիսի 8-ին հրավիրած ասուլիսի ժամանակ Սաքունցը նշեց, որ ընտրական գործընթացի նկատմամբ ընտրողների վստահությունը վերականգնված չէ: «Եվ դա պայմանավորված է եղել այն բանով, որ ընտրախախտումների վերաբերյալ ահազանգերը պատշաճ ուշադրության չեն արժանացել՝ չնայած հավաստիացումներին»,- ասաց նա:

ՀՔԱՎ գրասենյակի 94 դիտորդներ և Գորիսի կանանց ռեսուրս կենտրոնի 104 դիտորդներ մայիսի 6-ին կարճաժամկետ դիտորդություն են իրականացրել Գյումրիում, Վանաձորում, Իջևանում և Երևանի թիվ 7 ընտրատարածքում և արձանագրել են մի շարք խախտումներ, որոնք ամբողջական տեսքով կներկայացնեն 10 օրից:

Դրանք հիմնականում վերաբերում են օքսիդացող դրոշմակնիքին, ընտրակաշառքներին, բաց քվեարկությանը, «կարուսել» երևույթին և այլն: Արթուր Սաքունցը նշում է, որ ընտրակաշառք է բաժանվել հատկապես վերջին օրերին: Իրենց դիմած քաղաքացիներն ավելի շատ ահազանգել են ՀՀԿ-ի կողմից բաժանվող ընտրակաշառքի մասին, եղել են նաև ԲՀԿ-ի և ՀՅԴ-ի կողմից բաժանվող ընտրակաշառքի մասին խոսակցություններ:

Սաքունցի խոսքերով՝ ընտրախախտումների վերաբերյալ իրենք ունեն ապացույցներ՝ տեսանյութերի, լուսանկարների տեսքով, որոնց մասին հաղորդագրություններ են ուղարկել իրավապահ մարմիններիներին և անպատասխան մնացել:

ՀՔԱՎ գրասենյակի ղեկավարը պնդում է, որ ոստիկանության գործողությունները ահազանգերի համեմատ եղել են անհամաչափ, ընտրախախտումների և հատկապես՝ ընտրակաշառքի կանխարգելման ուղղությամբ օպերատիվ գործողություններ իրենք չեն տեսել: 

Արթուր Սաքունցի գնահատմամբ՝ դիտորդական առաքելություն իրականացնող ոչ բոլոր կազմակերպություններն են օգտագործել իրենց իրավունքները՝ կանխարգելելու ընտրախախտումները կամ օրենքի ոչ պատշաճ կիրառումը: Նա ունի փաստեր, որոնք կներկայացնի վերջնական զեկույցում:

Նա նաև նշում է, որ ընտրական հանձնաժողովների կողմից ընտրախախտումները կանխարգելելու կամք և պատրաստակամություն իրենք չեն տեսել: «Եթե մենք միայն կանգնեինք և դիտարկեինք, մեր աչքի առջև այդ խախտումները կլինեին: Իսկ երբ դիտորդը օգտվել է իր իրավունքից և հանձնաժողովի նախագահին ներկայացրել է խախտումը, դրանք վերացվել են: Կարծես թե այդպիսի հրահանգ ունեին, որ հնարավորության դեպքում հաշվի առնեն դիտորդների նկատառումները»,- ասում է Արթուր Սաքունցը:

 Անդրադառնալով ԵԱՀԿ ԺՀՄԻԳ դիտորդների եզրակացությանը, նա զեկույցը համարում է ֆորմալ առումով իրականությանը համապատասխանող, սակայն՝ «ֆրագմենտալ», քանի որ հաշվի չի առնվել մինչ ընտրությունները ստեղված մթնոլորտը, այլ նախադրյալներ:

Նա զարմանում է, որ միջազգային կազմակերպության զեկույցի մեջ «կարուսելի» մասին որևիցե ակնարկ չկար: «Երևի միջազգային դիտորդները համարժեք ձևով չեն կարողացել գնահատել ծրարներում քվեաթերթիկների բացակայության մասսայականություն և դրա հնարավոր ռիսկերը»,- նշեց Սաքունցը:

Իսկ ԱՊՀ դիտորդների եզրակացության մասին նա հրաժարվեց որևէ մեկնաբանություն անելուց, քանի որ նրանք «ներկայացնում են ավտորիտար ռեժիմով երկրներ, որտեղ ժողովրդավար ընտրություններ չկան»:  

Հեղինակը՝ Մերի Ալեքսանյան
Աղբյուրը՝ www.hra.am